Ychwanegu i Google
Mae’r Cyngor Cefn Gwlad Cymru wedi sefydlu swyddi 6 mis ‘dan hyfforddiant’ i unigolion sydd wedi bod yn astudio pynciau gwyddonol ac amgylcheddol drwy gyfrwng y Gymraeg.
Yn y cyfnod economaidd anodd hwn mae’n dipyn o her i bobl ifanc lwyddo cael eu troed yn y drws o ran swyddi. Er bod y Cyngor Cefn Gwlad wedi bod yn cefnogi Amnawdd, yn ariannol a thrwy gynnig lleoliadau, ers blynyddoedd bellach, sylweddolwyd ei bod yn dal i fod yn anodd i bobl o’r coleg gael y profiadau a fyddai’n eu helpu i gynnig am swyddi. Mae wedi bod yn wych i’r corff gael cymorth ychwanegol mewn cyfnod lle mae niferoedd staff yn gostwng, ac mae’r unigolion hefyd yn cael amrywaieth o brofiadau dros gyfnod llawer hwy na’r hyn sydd ar gael yn ystod cyfnod yr ysgoloriaeth Amnawdd ac felly yn gallu cymhwyso’u hunain yn well i fynd am swyddi mwy hirdymor. Am fwy o wybodaeth ac os oes gennych ddiddordeb cysylltwch â Jenny Pye … manylion isod.
Bu’r Cwmni Iaith wrthi yn ystod 2010-11 yn cynnal sawl cwrs ynglyn ag ymwybyddiaeth iaith, yn cynnwys cwrs i ‘hyfforddi’r hyfforddwyr’.
Mae Cwmni Iaith yn cynnal cyrsiau ymwybyddiaeth iaith a recriwtio ac mae’r rhain wedi bod yn boblogaidd iawn. Nid yw’r cyrsiau wedi cael eu creu yn benodol ar gyfer y sector amgylcheddol ond mae’n nhw’n berthnasol i fudiadau ac unigolion sy’n gweithio yn y maes hwnnw.
Cyswllt: Steve Eaves steve.eaves@iaith.eu
- Cynllun Noddi’r Amgylchedd yn Gymraeg.
- Am gael £1500 a phrofiad yn yr Amgylchedd?
- Am fynd i astudio’r amgylchedd trwy gyfrwng y Gymraeg yn y brifysgol?
- Mae ‘na alw am unigolion sy’n gallu trin a thrafod yr Amgylchedd yn ddwyieithog.
Cliciwch ar y canlynol am fanylion pellach:
Mae Prifysgol Bangor yn cynnig cwrs unigryw newydd mewn Rheolaeth Amgylcheddol Gynaliadwy, a hynny’n gyfan gwbl drwy’r Gymraeg. Mae’r cwrs sydd ar gael o fis Medi 2009 yn ymateb i’r galw cynyddol gan gyflogwyr am staff yn medru gweithio’n hyderus yn ddwyieithog ym maes cynaladwyedd amgylcheddol.
Mae cynaladwyedd yn thema allweddol sy’n rhedeg drwy holl bolisïau’r Cynulliad Cenedlaethol a’n rhan annatod o waith nifer o’n cyrff cenedlaethol.
Dyma’r cwrs gyntaf o’i fath ac mae’n arwain un ai at gymhwyster MA neu MSc. Mae’r Brifysgol wedi llwyddo i ddenu 9 o fyfyrwyr llawn a rhan-amser ar y cwrs eleni. Bydd felly yn apelio at bobol sydd yn gweithio mewn maes tebyg ac eisiau gwella’u cymwysterau a hefyd at rai sydd newydd raddio ac eisiau symud i’r maes yma o ran gwaith a gyrfa.
“Mae ein cwrs wedi ei gynllunio’n fanwl ac yn ganlyniad o drafodaethau gyda chyrff amgylcheddol a chyflogwyr perthnasol fel y Parciau Cenedlaethol, Asiantaeth yr Amgylchedd, Cyngor Cefn Gwlad Cymru a’r sector gwirfoddol. Bydd y cwrs yn diwallu’r anghenion am ddarpar staff o ansawdd uchel sydd â chefndir perthnasol a hefyd sy’n medru trafod eu pynciau yn hyderus yn y Gymraeg” esbonia Geraint George, Cyfarwyddwr y Cwrs, yn Ysgol Amgylchedd ac Adnoddau Naturiol y Brifysgol.
“Mae’n holl bwysig bod prifysgolion yn medru paratoi pobl ar gyfer y gweithle ac yn sicr mae angen mwy o siaradwyr Cymraeg yn y maes amgylcheddol” meddai Prif Weithredwr Cyngor Cefn Gwlad Cymru, Roger Thomas. “Mae ein sector angen pobl gyda chefndir academaidd sydd wedi ei gyfuno gyda phrofiadau galwedigaethol a phroffesiynol gan gynnwys datblygu sgiliau cyfathrebu dwyieithog, a dyma’n sicr bydd y cwrs unigryw yma yn ei wneud.”
Meddai Paula Roberts, Cymrawd Dysgu Cyfrwng Cymraeg yr Ysgol Amgylchedd ac Adnoddau Naturiol, “Mae’r cwrs hefyd yn estyniad naturiol i’r cyrsiau amgylcheddol cyfrwng Cymraeg eraill yr ydym eisoes yn eu cynnig ym Mangor, ond dyma’r cwrs ôl-radd gyntaf yn y maes gwyddonol ac amgylcheddol fydd ar gael yn gyfan gwbl drwy’r Gymraeg.”
Mae’r Brifysgol yn gweithio’n agos efo’r diwydiant a bydd y myfyrwyr yn ymgymryd â chyfnod o leoliad gwaith gyda chorff perthnasol yn ogystal â gwaith maes ymarferol yn Eryri, Cymoedd y De ac Iwerddon. Bydd y cwrs hefyd yn cynnwys modiwl unigryw er mwyn datblygu sgiliau Cymraeg yn arbennig i weithwyr yn y maes amgylcheddol.
Mae’r cwrs, sydd hefyd yn cael ei gefnogi gan Ganolfan Addysg Uwch Cyfrwng Cymraeg a Chyngor Cyllido Addysg Uwch Cymru, ar gael i bobol sydd efo gradd berthnasol neu ymgeiswyr sydd â phrofiad eang o waith perthnasol. Mae’n arbennig o addas ar gyfer staff proffesiynol sydd yn barod mewn swydd ac sy’n awyddus i ddatblygu’u gyrfa ymhellach.
Mae cefnogaeth ariannol ar gael i ddarpar fyfyrwyr un ai drwy AmNawdd, sef y cynllun noddi ar gyfer myfyrwyr sy’n dilyn pynciau amgylcheddol drwy gyfrwng y Gymraeg neu drwy fwrsariaeth arbennig Prifysgol Bangor.
Dylai unrhyw un sydd angen gwybod mwy am y cwrs gysylltu gyda Geraint George ym Mhrifysgol Bangor: E-bost: g.d.george@bangor.ac.uk
Hefyd ceir manylion pellach ar wefan y brifysgol ar y cyfeiriad: www.bangor.ac.uk
Manylion Pellach:
Pam astudio drwy’r Gymraeg?
• Mae’n gosod sylfaen ardderchog i’r dyfodol o ran cael prawf pendant o ddeallusrwydd a defnydd ymarferol o’r Gymraeg.
• Mae cyflogwyr angen pobl ddwyieithog ar gyfer pob math o swyddi gwahanol.
• Ar gyfartaledd, mae cyflogau’n uwch lle mae angen gwybodaeth o ddwy iaith.
Am wybodaeth bellach cysylltwch gyda Geraint George, Ysgol Amgylchedd ac Adnoddau Naturiol, Prifysgol Bangor. E-bost: g.d.george@bangor.ac.uk Ffon: 01248 383649
Cynhelir seminar yn flynyddol i fyfyrwyr a noddir drwy Gynllun AmNawdd. Prif bwrpas y seminar yw:
- Rhannu gwybodaeth am y swyddi sydd ar gael yn y maes amgylcheddol.
- Rhannu profiadau cyn-fyfyrwyr y Cynllun AmNawdd.
- Gwella sgiliau myfyrwyr i ysgrifennu ceisiadau am waith.
- Hybu pwysigrwydd defnyddio’r Gymraeg o fewn y maes amgylcheddol.
Cynhelir y seminar flynyddol nesaf Tachwedd 2010 ym Mhrifysgol Aberystwyth.
Am ragor o wybodaeth am y seminar, cysylltwch â Jenny Pye, Swyddog Iaith a Chydraddoldebau Cyngor Cefn Gwlad Cymru (01248 387122 / j.pye@ccw.gov.uk).
Wrth gadw mewn cyswllt gyda chyn-fyfyrwyr a noddwyd drwy Gynllun AmNawdd mae modd monitro effeithiolrwydd y Cynllun. Yr hyn sy’n galonogol am Gynllun AmNawdd yw canfod fod:
- Canran sylweddol o’r cyn-fyfyrwyr yn cael swyddi o fewn y sector amgylcheddol
- Canran uchel iawn yn aros i weithio yng Nghymru
- Canran uchel o’r myfyrwyr yn gwneud defnydd o’r Gymraeg yn eu swyddi o ddydd i ddydd
Dyma roi syniad hefyd pwy yw prif gyflogwyr cyn-fyfyrwyr a noddwyd drwy Gynllun AmNawdd:
- Adrannau Amgylcheddol Llywodraeth Leol
- Asiantaeth yr Amgylchedd
- Cadw Cymru’n Daclus
- Comisiwn Coedwigaeth
- Cyngor Cefn Gwlad Cymru
- Parciau Cenedlaethol
- Sefydliad NATUR
- Yr Ymddiriedolaeth Genedlaethol
Os hoffech astudio mewn maes amgylcheddol trwy gyfrwng y Gymraeg yn y brifysgol, mae ‘na gyfle i gael hyd at £1500 o nawdd.
Mae’r cynllun noddi amgylcheddol cyfrwng Cymraeg yn cynnig cyfle gwych i fagu sgiliau ymarferol yn y maes yn ogystal â datblygu’r gallu i drin a thrafod yr amgylchedd yn ddwyieithog.
Beth yw pwrpas y cynllun?
- Pwrpas y cynllun yw cynyddu’r niferoedd o arbenigwyr Cymraeg yn y maes amgylcheddol.
- Hyrwyddo a chynyddu’r ddarpariaeth cyfrwng Cymraeg yn y sector addysg uwch mewn meysydd amgylcheddol
- Cynnig cyfleoedd gyrfaol i siaradwyr Cymraeg mewn meysydd amgylcheddol trwy ddarparu lleoliadau gwaith addas a pherthnasol.
Beth yw’r amodau?
- Astudio o leiaf 40 credyd yn y maes amgylcheddol trwy gyfrwng y Gymraeg dros 3 blynedd (bydd rhestr o’r cyrsiau perthnasol a’r prifysgolion ar gael yma ddiwedd Hydref 2009)
- Treulio cyfnod ar brofiad gwaith gydag un o’r asiantaethau – yn ôl un myfyriwr “…mi oedd wythnosau profiad gwaith yn fwy gwerthfawr na’r arian hyd yn oed.”
- Yn gwneud cais yn 2010 i fynd i’r brifysgol
- Mynychu seminarau a chynadleddau cysylltiedig â’r cynllun
- Dyddiad cau ar gyfer ceisiadau: Mawrth 4 2010
Y Noddwyr
Prif noddwyr y Cynllun AmNawdd yw: 
- Cyngor Cefn Gwlad Cymru
- Asiantaeth yr Amgylchedd Cymru
- Comisiwn Coedwigaeth Cymru
- Mantais trwy Ganolfan Addysg Uwch Cyfrwng Cymraeg
Gwefannau cyrff a mudiadau defnyddiol
Calendr Digwyddiadau - y diweddaraf ym maes yr amgylchedd